Azərbaycan Respublikasının Korrupsiyaya qarşı mübarizə üzrə Komissiyasının işçi qruplarının tərkibinin komplektləşdirilməsi məqsədilə vakant yerlər üzrə əlavə müraciət mərhələsi elan olunur

Azərbaycan Respublikasının 2005-ci il 3 may tarixli 906-IIQ nömrəli Qanunu ilə təsdiq edilmiş “Azərbaycan Respublikasının Korrupsiyaya qarşı mübarizə üzrə Komissiyası haqqında” Əsasnamə və Komissiyanın 2025-ci il 6 fevral tarixli 1 nömrəli Qərarı ilə təsdiq edilmiş Reqlamentinə (bundan sonra – Reqlament) uyğun olaraq, Komissiyanın işçi qruplarının tərkibinə qeyri-hökumət təşkilatları (bundan sonra – QHT-lər), media subyektləri və özəl sektorun nümayəndələri, eləcə də müstəqil ekspertlərin seçilməsi məqsədilə Komissiyanın Katibliyi (bundan sonra – Katiblik) tərəfindən cari ilin 15 fevral tarixində müsabiqə elan edilmişdir.

Müraciətlər Komissiyanın Katibliyi tərəfindən Reqlamentin 2.2-ci bəndində nəzərdə tutulmuş meyarlar – təcrübə, təhsil, hüquqi və sosial tədqiqat aparmaq qabiliyyəti, təşəbbüskarlıq, komanda işi bacarığı, tənqidi təfəkkür və digər kriteriyalar əsasında qiymətləndirilmişdir. Aparılmış qiymətləndirmə nəticəsində aşağıda göstərilən 8 QHT və 3 müstəqil ekspertin müraciəti müsbət dəyərləndirilmiş, onların Komissiyanın aidiyyəti işçi qruplarının tərkibinə daxil edilməsi barədə qərar qəbul edilmiş və bu istiqamətdə müsabiqənin nəticəsi cari ilin 7 aprel tarixində Komissiyanın rəsmi internet səhifəsində açıqlanmışdır:
 

Seçilmiş qeyri-hökumət təşkilatları və onların təmsil olunacağı işçi qrupları:

Qanunvericiliyin təkmilləşdirilməsi üzrə işçi qrupu

• “İnsan hüquqlarının təşviqi mərkəzi” İctimai Birliyi;
• “Zəfər” şəhid ailələrinə dəstək” İctimai Birliyi;
• “Vətəndaşların əmək hüquqlarını müdafiə liqası” İctimai Birliyi.

Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə üzrə işçi qrupu

• “Azərbaycan kibertəhlükəsizlik təşkilatları assosiasiyası” İctimai Birliyi.

Təhsil və maarifləndirmə üzrə işçi qrupu

• “Mülki cəmiyyətə doğru” İctimai Birliyi;
• “Vətəndaşların əmək hüquqlarını müdafiə liqası” İctimai Birliyi.

Korrupsiya risklərinin qiymətləndirilməsi üzrə işçi qrupu

• “Hüquqi təhlil və araşdırmalar” İctimai Birliyi.

Korrupsiyaya qarşı mübarizə üzrə dövlət proqramlarının monitorinqi üzrə işçi qrupu

• “Qadın, inkişaf, gələcək” İctimai Birliyi;
• “Prioritet” sosial iqtisadi araşdırmalar mərkəzi” İctimai Birliyi;
• “Hüquqi təhlil və araşdırmalar” İctimai Birliyi.

Seçilmiş müstəqil ekspertlər və onların təmsil olunacağı işçi qrupları:

Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə üzrə işçi qrupu

• Bayram Baxşalıyev.

Korrupsiya risklərinin qiymətləndirilməsi üzrə işçi qrupu

• Fuad Kələşli.

Korrupsiyaya qarşı mübarizə üzrə dövlət proqramlarının monitorinqi üzrə işçi qrupu

• Həbib Cəfərov.

Komissiyanın işçi qruplarının tərkibinin funksional tamlığını, iştirakçı balansını və son müraciət tarixindən sonra müşahidə olunan marağı nəzərə alaraq, həmin işçi qrupların tərkibinin komplektləşdirilməsi məqsədilə, vakant yerlər üzrə əlavə müraciət mərhələsi elan olunur.

 

İşçi qrupların adları	Fəaliyyət istiqamətləri
Qanunvericiliyin təkmilləşdirilməsi üzrə işçi qrupu	normativ hüquqi akt layihəsinin hazırlanması; Katiblik tərəfindən işçi qrupa təqdim olunmuş normativ hüquqi akt layihəsinə və digər məsələlərə dair rəy verilməsi; Katibliyin müraciəti əsasında Komissiyanın iclasında müzakirə ediləcək məsələlərin nəzəri aspektlərinə və beynəlxalq təcrübədəki nümunələrinə dair məlumat verilməsi; Katibliyin müraciəti əsasında və ya işçi qrupun öz təşəbbüsü ilə korrupsiyaya qarşı mübarizə və şəffaflıq sahəsində beynəlxalq reytinqlərdə ölkəmizin mövqeyinin daha da yaxşılaşdırılması, eləcə də bu sahədə mövcud olan problemlər və onların həlli yollarına dair təkliflərin verilməsi; korrupsiyaya qarşı ixtisaslaşmış beynəlxalq təşkilatlar və ya digər beynəlxalq reytinq qurumlarının sorğularına orqanlar (qurumlar) tərəfindən hazırlanmış cavablara dair rəyin verilməsi.
Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə üzrə işçi qrupu	korrupsiyaya qarşı mübarizə üzrə dövlət proqramlarının icra vəziyyətini təhlil etmək, onların səmərəlilik və effektivliyini qiymətləndirmək; Katibliyin müraciəti əsasında Komissiyanın iclasında müzakirə ediləcək məsələlərin nəzəri aspektlərinə və beynəlxalq təcrübədəki nümunələrinə dair məlumat verilməsi; Katibliyin müraciəti əsasında və ya işçi qrupun öz təşəbbüsü ilə korrupsiyaya qarşı mübarizə və şəffaflıq sahəsində beynəlxalq reytinqlərdə ölkəmizin mövqeyinin daha da yaxşılaşdırılması, eləcə də bu sahədə mövcud olan problemlər və onların həlli yollarına dair təkliflərin verilməsi; korrupsiyaya qarşı ixtisaslaşmış beynəlxalq təşkilatlar və ya digər beynəlxalq reytinq qurumlarının sorğularına orqanlar (qurumlar) tərəfindən hazırlanmış cavablara dair rəyin verilməsi.
Təhsil və maarifləndirmə üzrə işçi qrupu	təlimlər, kurslar, nəşrlər, təşviqat materialları və digər üsullarla korrupsiyaya qarşı mübarizə sahəsində maarifləndirmə işinin həyata keçirilməsində iştirak etmək və bu barədə təkliflər vermək; Katibliyin müraciəti əsasında Komissiyanın iclasında müzakirə ediləcək məsələlərin nəzəri aspektlərinə və beynəlxalq təcrübədəki nümunələrinə dair məlumat verilməsi; Katibliyin müraciəti əsasında və ya işçi qrupun öz təşəbbüsü ilə korrupsiyaya qarşı mübarizə və şəffaflıq sahəsində beynəlxalq reytinqlərdə ölkəmizin mövqeyinin daha da yaxşılaşdırılması, eləcə də bu sahədə mövcud olan problemlər və onların həlli yollarına dair təkliflərin verilməsi; korrupsiyaya qarşı ixtisaslaşmış beynəlxalq təşkilatlar və ya digər beynəlxalq reytinq qurumlarının sorğularına orqanlar (qurumlar) tərəfindən hazırlanmış cavablara dair rəyin verilməsi.
Korrupsiya risklərinin qiymətləndirilməsi üzrə işçi qrupu	orqanlarda (qurumlarda) korrupsiya risklərinin qiymətləndirilməsi metodologiyasının hazırlanması, ayrı-ayrı sahələr üzrə risklərin müəyyən edilməsi, təhlili, qiymətləndirilməsi və müvafiq tədbirlərin görülməsi; Katibliyin müraciəti əsasında Komissiyanın iclasında müzakirə ediləcək məsələlərin nəzəri aspektlərinə və beynəlxalq təcrübədəki nümunələrinə dair məlumat verilməsi;
Korrupsiyaya qarşı mübarizə üzrə dövlət proqramlarının monitorinqi üzrə işçi qrupu	korrupsiyaya qarşı mübarizə üzrə dövlət proqramlarının icra vəziyyətini təhlil etmək, onların səmərəlilik və effektivliyini qiymətləndirmək; Katibliyin müraciəti əsasında Komissiyanın iclasında müzakirə ediləcək məsələlərin nəzəri aspektlərinə və beynəlxalq təcrübədəki nümunələrinə dair məlumat verilməsi; Katibliyin müraciəti əsasında və ya işçi qrupun öz təşəbbüsü ilə korrupsiyaya qarşı mübarizə və şəffaflıq sahəsində beynəlxalq reytinqlərdə ölkəmizin mövqeyinin daha da yaxşılaşdırılması, eləcə də bu sahədə mövcud olan problemlər və onların həlli yollarına dair təkliflərin verilməsi; korrupsiyaya qarşı ixtisaslaşmış beynəlxalq təşkilatlar və ya digər beynəlxalq reytinq qurumlarının sorğularına orqanlar (qurumlar) tərəfindən hazırlanmış cavablara dair rəyin verilməsi;

 

Müsabiqədə iştirak üçün tələblər

Namizədlər seçilərkən aşağıdakı meyarlar nəzərə alınır:

• İşçi qrupun fəaliyyət sahəsi üzrə təcrübə;
• Hüquqşünaslıq (o cümlədən beynəlxalq və müqayisəli hüquq), dövlət idarəetməsi və korrupsiyaya qarşı mübarizə sahəsində təhsil və təcrübə;
• Hüquqi və sosial tədqiqat aparmaq qabiliyyəti;
• Normayaratma sahəsində təcrübə;
• Komanda şəklində işləmək bacarığı;
• Təşəbbüskarlıq;
• Xarici dil bilgisi;
• Problem həlletmə bacarığı;
• Tənqidi təfəkkür;
• Məsuliyyətlilik.

Müsabiqədə iştirak üçün müraciət qaydası

Müsabiqədə iştirak etmək istəyən QHT-lər, media subyektləri və özəl sektor nümayəndələri, eləcə də müstəqil ekspertlər aşağıdakı sənədləri təqdim etməlidirlər:

Özəl sektor nümayəndələri və müstəqil ekspertlərə münasibətdə

• Müraciət forması (yüklə);
• Müraciətçinin tərcümeyi-halı (CV);
• İxtisas və təcrübəni təsdiq edən sənədlər;
• Şəxsiyyət vəsiqəsinin surəti (sənədin hər iki üzü).

QHT və media subyektlərinə münasibətdə:

• Müraciət forması (yüklə);
• Dövlət qeydiyyatı haqqında şəhadətnamənin surəti;
• Reyestrdən çıxarışın surəti;
• Nizamnamənin surəti;
• VÖEN-in surəti (sənədin hər iki üzü);
• QHT və ya media subyektinin nümayəndəsinin şəxsiyyət vəsiqəsinin surəti (sənədin hər iki üzü);
• QHT və ya media subyektinin nümayəndəsinin tərcümeyi-halı (CV).

Sənədlərin qəbulu

Müraciətlər 2025-ci ilin 30 aprel tarixinədək office@commission-anticorruption.gov.az e-poçt ünvanı vasitəsilə qəbul edilir.

Seçim prosesi

Müsabiqə iştirakçılarının qiymətləndirilməsi Komissiyanın Katibliyi tərəfindən aparılacaq və nəticələr elan ediləcəkdir.